Notícies Veir istoric
Eth Palai de Gèu de Vielha artenh enguan es milhores chifres d’abonats des darrèri cinc ans
En aguesti dus prumèri mesi der an, era miejana ei de 897 abonats, chifres semblantes as der inici de 2018
Era nauta chifra d’abonats qu’actuaument dispause eth Palai de Gèu mòstre eth bon estat que viu era installacion municipau des dera aparicion dera pandémia deth COVID-19 en 2019 e deth barrament dera installacion en 2021 ençà.
En aguesti dus prumèri mesi de 2023, era miejana d’abonats s’establís en 897, era milhor donada des darrèri cinc ans. Sonque en inici de 2018 s’auie artenhut ua chifra semblanta (863). Mès, de moment, ei de long era chifra mès nauta de 2018 ençà. En 2018, era miejana siguec de 705 abonats, fòrça luenh dera actuau. En 2019 siguec 648, en 2020 (damb es efèctes deth COVID-19) se placèc en 583, en 2021 (afectat peth barrament forçat en març) siguec 195, e en 2022 era miejana siguec de 504.
Es anualitats de 2020 e 2021 son es que mès influïren ena chifra d’abonats. En 2020 damb es efèctes dera pandémia deth COVID-19, mès sustot en 2021 damb eth barrament en març pes grèus desperfèctes dera installacion èren a baishar es chifres considerablament. Ja en darrèr trimesadèr de 2022, damb era recuperacion deth 100% des servicis abituaus (damb era dubertura dera pista de gèu), comencèc era tendéncia ara nauta actuau. Sonque en deseme de 2022, ja s’artenhèc 811 abonats.
Era aufèrta actuau deth Palai de Gèu se compause deth gimnàs, piscines, pista de gèu, rocòdrom, pista de pàdel e classes dirigides: iòga, stretching, aquasalut e EFM. Aguesta aufèrta ei previst aumentar-la damb exercicis ipopressius e spinning, des quaus se formen es tecnics esportius socorristes.
“Es
donades qu’actuaument auem d’abonats en Palai de Gèu mòstren
qu’aguesta installacion esportiua municipau que balhe servici non
sonque as vesins de Vielha e Mijaran,
senon de tota era Val d’Aran, viu un moment fòrça bon. Eth milhor
des darrèri cinc ans”,
comente eth dusau tinent d’alcalde e còsso d’espòrts, Alberto
López.
E ahig que “des
der equip de govèrn municipau auem patit inconvenients coma sigueren
eth COVID-19 e eth barrament de 2021, mès damb fòrça trabalh auem
tornat ara normalitat prealabla a 2020, en tot aufrir toti es
servicis abituaus, en çò qu’ei eth principau equipament esportiu
public de tota era Val d’Aran”.