Notícies Veir istoric
Eth Plan de Cooperacion Municipau dera Diputació de Lleida autrège a Vielha e Mijaran 201.930,75€ entà realizar inversions en municipi
Damb aguesta subvencion s’amiaràn a tèrme diuèrses milhores en Vielha e enes pòbles deth municipi en airaus coma eth hilat d’aigua, infraestructures e milhores de diuèrsi equipaments entre d’auti
Era Diputació de Lleida a aprovat eth Plan de Cooperacion Municipau entath finançament d’inversions des ajuntaments e entitats municipaus descentralizades dera província de Lhèida en periòde 2022-23. En Vielha e Mijaran, era quantitat autrejada ei de 201.930,75€, dera quau s’en veirà beneficiada autant Vielha coma eth conjunt d’entitats municipaus descentralizades.
En cas de Vielha, era Diputació de Lleida autrège 159.430,75€ entara milhora dera accessibilitat e adeqüacion des hilats deth servici d’aigua e aigües lordes dera avenguda Baile Calbetó Barra.
Ena EMD d’Arròs e Vila i a dus projèctes: era consolidacion deth mur de barrament perimetrau deth cementèri d’Arròs (4.250€) e era milhora dera part exteriora deth locau sociau de Vila (4.250€).
Era EMD d’Aubèrt e Betlan a recebut 8.500€ entà plaçar ua naua parabanda metallica entar accès deth locau sociau d’Aubèrt.
Era EMD de Betren recep 8.500€ entara reabilitacion parciau dera sala polivalenta, en un projècte damb un pressupòst totau de 35.887,28€.
Era EMD de Casau contemple dus projèctes: Ua naua pòrta d’accès ath locau sociau per valor de 2.500€ e eth nau enlumenat dera plaça dera glèisa per valor de 6.000€.
Ena EMD d’Escunhau e Casarilh, damb aguest finançament se procedís a aquerir ua naua parabanda en cementèri d’Escunhau, per valor de 8.500€.
Ena EMD de Gausac s’artenh ua subvencion de 8.500€ entara milhora dera pavimentacion ena carretèra de Gausac, en ua actuacion que compde damb un pressupòst totau de 368.248,41€.
E, fin finau, era EMD de Vilac recep ua subvencion per valor de 8.500€ entar aqueriment de naui equipaments entath parc biosaludable.