Notícies Veir istoric
Vielha acuelherà era 5au edicion deth hestau Mendi Tour es pròplèu 17 e 18 de març
Vielha e Mijaran organize aguest eveniment a on se projectaràn ueit des milhors films de cinèma de montanha dera darrèra edicion deth Bilbao Mendi Film Festival
Es pròplèu 17 e 18 de març, Vielha tornarà a celebrar ua naua edicion deth hestau de cinèma de montanha Mendi Tour Vielha.
Pendent aguesta 5au edicion d’aguestes jornades, se projectaràn un totau de 8 pellicules. Diuendres 17 de març, a compdar des 19:00, se començarà damb Adrenaline Sucks” (Seccion Oficiau Mendi Festival 2022), dirigida per Chase Odgen. Er esquiaire Matthias Giraud explique era sua aficion pes espòrts d’aventura. Eth 2au film se titole “Doo Sar” (Seccion Oficiau Mendi Festival 2022), dirigit per Jakub Gzela, a on dus amics expliquen era sua experiéncia en Karakorum. Era 3au projeccion ei “New Way Up” (Seccion Oficiau Mendi Festival), de Jake Holland. Ua vision desparièra deth Karakorum damb Fabi Buhl e Will Sim. E eth prumèr dia s’acabarà damb era projeccion de “Egoland” (Prèmi deth Public/Mencion Especiau deth Jurat 2022), dirigida per Ignasi López, que tracte sus era experiéncia de Marek Molek e Bruno Grassi en The Great Troll.
Dissabte 18 de març, se projectaràn quate films mès a compdar des 19:30. Era prumèra filmacion ei “Into the Ice” (Seccion Oficiau Mendi Festival 2022), d’Andrew Opila, en tot parlar sus eth viatge de sèt amics as montanhes Darwin, en America deth Sud. Era dusau projeccion ei “A Baffin Vacation” (Seccion Oficiau Mendi Festival 2022), de Sarah McNair-Landry e Erik Boomer, que parle dera sua expedicion ara ièrla Baffin pendent 45 dies. Eth 3au film ei “This is Beth” (Prèmi deth Jurat 2022), de Jen Randall. E eth hestau finalizarà damb “Free Rider (Seccion Oficiau Mendi Festival 2022), de Jérôme Tanon.
Era entrada as jornades ei gratuïta, enquia completar er aforament dera sala d’Era Audiovisuau, e se poiràn recuélher es entrades fisicament a compdar d’aguest pròplèu diuendres ena sedença deth consistòri en orari abituau, de deluns a diuendres, des 08:00 as 14:00.
“Eth hestau Mendi Tour Vielha ei ua apòsta que des der Ajuntament de Vielha e Mijaran volem mantier, pr’amor que supause un element mès qu’ajude ath nòste municipi a assolidar-mos coma destinacion de referéncia de nauta montanha enes Pirenèus”, comente eth baile de Vielha e Mijaran, Juan Antonio Serrano.
Pera sua part, era mairia deth hestau, era aupinista Edurne Pasaban, afirme qu’”ei un aunor poder tornar a celebrar ua naua edicion d’aguest eveniment, en quau auram films de fòrça qualitat, damb desparièrs espòrts d’aventura, en tot hèr un torn per diuèrsi espòrts d’iuèrn”.
Ath delà, eth prumèr dia deth hestau, ath maitin, er alumnat der Institut d’Aran poirà veir diuèrsi films en un passi privat en Era Audiovisuau. “Volem apropar eth cinèma de montanha as joeni, que son eth futur, e per açò, enguan, tornam a aufrir-les era visualizacion de diuèrsi films deth hestau, e jo madeisha impartirè ua charrada sus es valors dera montanha”, comente Pasaban.
06/03/2023