Notícies Veir istoric
Er Ajuntament de Vielha e Mijaran adjudique es òbres entà desvolopar eth Plan de Milhora Urbana 2.2 en airau de Còto Março de Vielha
Damb aguesta intervencion se procedirà a daurir naui carrèrs en centre deth pòble damb era creacion de 48 places de parcatge naues en entorn deth cementèri e a destinar ua part dera via publica a zònes ajardinades e entà pedons
Er Ajuntament de Vielha e Mijaran a adjudicat es trabalhs entà desvolopar era urbanizacion de carrèrs deth Plan de Milhora Urbana 2.2 en airau de Còto Março de Vielha.
Ua intervencion qu’ei fòrça de besonh, que permeterà daurir naui carrèrs en entorn deth cementèri de Vielha damb connexion dirècta damb eth Carrèr Sarriulèra e era Avenguda Pas d’Arró. Tanben se crearàn 48 naues places de parcatge e zònes ajardinades e entà pedons, que permeterà crear espacis de léser e dignificarà eth centre deth casc urban. Tot eth terren que s’urbanizarà aucupe un espaci de 4.435,78 m2.
Per un costat, se realizarà era pavimentacion des carrèrs Sant Miquèu, Metdia, Frederic Mistral e Vielh deth Pòrt damb era creación de naui trepadèrs e places de parcatge, installacion d’un nau enlumenat public LED e condicionament de zònes ajardinades damb mobiliari urban (bancs, jardinères, paperères, eca). Atau madeish, s’adaptaràn es hilats de sanejament, en tot canalizar es aigües dera pluja e es aigües residuaus, atau coma assegurar es subministraments basics d’aigua, gas e telecomunicacions.
Aguest projècte d’urbanizacion deth PMU 2.2 de Còto Março compde damb un pressupòst de 659.383,57€ e ei previst qu’es òbres siguen prèstes en cinc mesi.
“Damb aguesta intervencion ampliam eth casc urban de Vielha, en tot crear naui espacis entara ciutadania. Ua milhora importanta d’aguest airau que beneficiarà era circulacion de veïculs e permeterà crear naues places de parcatge en centre deth pòble”, comente eth baile de Vielha e Mijaran, Juan Antonio Serrano.
14/03/2023