ES | CA | AR |

Newsletter

Email

Nòm

Cognòms

Soscriu-te

Agenda

29/11/2019

Er Ajuntament de Vielha e Mijaran fomente er espòrt en Palai de Gèu entre es joeni/es deth municipi damb ua melhora economica des abonaments

Entà 2020 se modifique er abonament infantil, que passarà a èster juvenil entàs joeni/es entre 16 e 22 ans, e se cree un nau abonament infantil entàs menors de 16 ans, en tot facilitar er accès dera joenessa damb prètzi economics

Er Ajuntament de Vielha e Mijaran vò contunhar en tot fomentar era practica esportiva des joeni/es deth municipi. En aguest sens, de cara ar an 2020 a amiat a tèrme ua modificacion substanciabla des prètzi des abonaments deth Palai de Gèu, atau coma era creacion de naui abonaments, damb er objectiu de qu’era joenessa age mès facilitats entà poder accedir ara installacion pendent tot er an.


Per un costat, er abonament infantil càmbie de nòm, en tot passar a nomentar-se coma abonamenat juvenil, e que va dirigit as joeni/es qu’an entre 16 e 22 ans.


Ath delà, se cree un nau abonament infantil, que va dirigit as menors d’edat (joeni/es entre 4 e 15 ans). Mentre, qu’es hilhs des abonats qu’agen mens de 4 ans, an era entrada gratuïta tostemp que venguen acompanhadi d’eri.


Per tant, a compdar de 2020 es categories d’abonaments seràn: Adult, Juvenil, Infantil, Gent Grana e Familhar.


Damb toti aguesti cambis, er objectiu ei qu’es joeni entre 4 e 22 ans poguen auer mès facilitats economiques entà accedir a practicar quinsevolh tipe d’espòrt o activitat dirigida que s’aufrís en Palai de Gèu. Ei un sector fòrça ample dera societat de Vielha e Mijaran, e damb era naua estructura d’abonaments, auràn prètzi mès competitius e s’incentivarà qu’era donada d’usatgèrs pendent tot er an sigue mès anaut.


D’aute biais, eth Palai de Gèu adapte es quòtes annaus de patinatge ath nau calendari der emplec dera pista de gèu que permet era naua pista mobila provisionau. En aguest sens, es corsi, en compdes de finalizar en mes d’abriu, s’alongaràn enquia finaus de mai, coma era rèsta de corsi ena installacion, en tot guanhar un mes de gèu respècte a çò qu’ère abituau damb era anteriora pista de gèu. Ath delà, s’eliminen es quòtes setmanaus de natacion e patinatge per manca d’emplec.


Damb era naua aufèrta d’abonaments qu’aurà eth Palai de Gèu a compdar de 2020, des der Ajuntament fomentam qu’un ample sector dera joenessa, qu’a entre 4 e 22 ans, vengue ara installacion a practicar espòrt”, comente eth dusau tinent d’alcalde e còsso d’espòrts, Alberto López. E hig que “er objectiu finau ei que s’apròpe eth màger nombre de gent ath Palai de Gèu, en tot èster eth principau equipament esportiu de Vielha e Mijaran. Es joeni son eth nòste futur, e damb es naui cambis, demoram que fòrça mès joeni/es siguen usatgèrs abituaus. E d’aguesta manèra, contunham en tot promòir ua vida saludabla, en tot practicar espòrt entre toti es sectors dera poblacion”.

15/11/2019

Mapa

Cerques quauque lòc en Vielha e Mijaran?

Cerques quauque lòc en Vielha e Mijaran?

Tel +34 973 640 018 info@vielha-mijaran.org C/ Sarriulera 2. Vielha 25530 Lleida