Er Ajuntament de Vielha e Mijaran daurís un procès de participacion publica entà elaborar eth reglament d’usatge e resèrva des equipaments esportius municipaus
Se daurís un periòde de 10 dies abils entà respóner ua enquèsta que permeterà auer un màger coneishement dera matèria per part dera ciutadania, e qu’ei disponibla ena plana web deth consistòri
Er Ajuntament de Vielha e Mijaran trabalhe ena redaccion deth reglament d’usatge e resèrva des equipaments esportius municipaus: Palai de Gèu, pista poliesportiva descubèrta, fronton municipau, skate park municipau e pista de pàdel municipau. Entà poder arribar a elaborar-la, acabe de daurir un procès de participacion publica entà qu’es vesins e vesies poguen exprimir eth sòn punt d’enguarda.
Es persones interessades poderàn respóner ua enquèsta a compdar d’aué e que demorarà daurit, a compdar de deman, pendent 10 dies abils, a trauès deth següent ligam: https://vielhaparticipa.my.canva.site/
Aguesta enquèsta ei abilitada enes tres idiòmes oficiaus: aranés, castelhan e catalan.
Eth prètzhèt ei requectar era opinion des subjèctes e des organizacions potenciauments afectades pera futura nòrma sus: Es problèmes que se pretenen solucionar damb era iniciatiua, eth besonh e era oportunitat dera sua aprobacion, es objectius dera nòrma e es possibles solucions alternatives, regulatòries e non regulatòries.
Era participacion ciutadana ei fondamentau entà dessenhar ua normativa consensuada.
Er Ajuntament de Vielha e Mijaran encorage a tota era ciutadania a participar activaments en aguest procès, contribuïnt atau a elaborar un reglament que respone as besonhs reaus deth municipi.
Atau madeish, s’a abilitat un corrèu electronic de participacion ciutadana entà que quinsevolh persona pogue hèr aportacions, e que seràn degudaments incorporades ena consulta. Aguest corrèu ei participacion@vielha-mijaran.org
Segontes soslinhe eth baile de Vielha e Mijaran, Juan Antonio Serrano, “volem qu’aguest reglament sigue frut deth dialòg e dera participacion ciutadana. Er emplec des equipaments esportius municipaus ei quauquarren que mos aucupe a toti e, per aquerò, volem que toti es vesins e vesies que les empleguen e se preocupen peth sòn foncionament, prenen part en tot respóner era enquèsta, en tot sajar d’omogeneïzar-ne er emplec”.
16/03/2026
