Eth Centre de Joenessa “Antara” barre era sason 2024-25 damb es milhores donades istoriques d’usatgèrs, en tot assolidar-se coma espaci de léser de referéncia entàs joeni de Vielha e Mijaran
En tota era sason i a auut un totau de 2.770 usatgèrs, en tot establir ua mejana de lèu 23 usatgèrs per dia enes 121 dies abils qu’Antara a daurit ath public
Eth Centre de Joenessa “Antara” de Vielha ven de finalizar era sason 2024-25 damb ues granes donades d’usatgèrs, en tot assolidar era vasta aufèrta de léser que li place coma espaci de referéncia entara joenessa deth municipi.
En aguest cors escolar, i a auut un totau de 2.770 usatgèrs, en tot establir ua mejana de 22,89 usatgèrs per dia enes 121 dies abils qu’Antara a daurit ath public.
Antara ei un equipament der Ajuntament de Vielha e Mijaran destinat ara joenessa deth municipi a on traparàn un espaci de participacion, de relacion e de dinamizacion entà favorir era coesion sociau, potenciar era interrelacion e prebotjar era plea ciutadania dera nòsta joenessa. Ei un servici public e gratuït a on era joenessa pòt trobar un ample ventalh d’informacion e orientacion sus educacion, formacion, participacion, òci, salut, cultura, léser, concorsi, viatges, mobilitat internacionau…e que compde damb professionaus en encastre dera joenessa entà assessorar-les e acompanhar-les. En aguest sens, s’i realizen activitats formatiues sus ahèrs d’actualitat e que les ajuden de cara ath futur en matéries coma: violéncia sexuau, consum d’alcoòl, expectatiues laboraus e d’estudis. Ath delà, tanben s’a començat a implementar espòrts coma badminton o tennis taula entà ajudar ara coesion sociau.
Antara siguec inaugurat en 2018 e des d’alavetz a estat eth centre de léser de referéncia entara joenessa de Vielha e Mijaran pendent es dimenjades que dure eth cors escolar. Er orari abituau ei des 17:00 as 20:30 de diuendres a dimenge, atau coma tota era setmana entièra enes epòques hestiues de Pasca e Nadau.
Eth centre ei abilitat entara joenessa des 12 as 18 ans. Eth reng d’edat mès abituau ei des 14 as 17 ans, ua donada mès anauta qu’enes prumèri ans d’Antara (a on se plaçaue entre es 12 e es 15 ans), pr’amor qu’es adolescenti d’aguestes edats, ja comencèren a vier entath centre quan èren mès petiti.
“Èm erosi de veir era bona acuelhuda qu’a Antara enter es adolescents, e que demore reflectit enes granes donades d’usatgèrs que cada an se registren e qu’enguan an estat de rècord. Auem fòrça activitats entà da eri pendent tot eth cors escolar, e era sua responsa mòstre qu’ei eth lòc de referéncia entà poder hèr activitats o simplaments auer un lòc entà conversar e passar es dimenjades damb amics”, comente eth còsso de joenessa de Vielha e Mijaran, David Moreno. E ahig que “de cara as pròplèu ans seguiram damb era volontat de poder aufrir mès activitats entara joenessa, en tot coordinar-mos damb eth Conselh Generau d’Aran, entà que mès mainadèra s’apròpe a gaudir d’Antara”.
01/07/2025
