Notícies Veir istoric
Er Ajuntament de Vielha e Mijaran refortilhe era comunicacion de notícies damb era ciutadania a trauès deth nau canau de Whatsapp deth consistòri
Damb aguesta naua airina rapida e dirècta damb es vesins deth municipi, s’enviarà messatges de forma immediata a toti es usatgèrs que seguissen eth canau damb tota era informacion que se genère
Er equip de govèrn der Ajuntament de Vielha e Mijaran apòste per milhorar, encara mès, era comunicacion dirècta dera accion de govèrn municipau e avisi d’interès damb es vesins deth municipi. Aguesta mesura se concrète damb era implementacion deth nau canau de Whatsapp deth consistòri, a trauès deth quau, toti es usatgèrs que le seguisquen poiràn èster ath corrent de totes es notícies que se genèren cada dia en Vielha e Mijaran.
Coma hèr-se usatgèr deth canau de Whatsapp der Ajuntament de Vielha e Mijaran?
Entà èster usatgèr, auetz dues opcions:
- En tot entrar en següent ligam:
https://whatsapp.com/channel/0029VaWH3nZ6mYPJj4P4e80
- En tot escanejar eth còdi que s’adjunte ena imatge dera notícia e seguir es passi que s’informe
Coma foncione?
A totes es persones lis arribarà, immediataments, es notícies e activitats que se desvolopen en consistòri e en municipi e que son publicades, tanben, enes diuèrsi canaus d’informacion municipau, ei a díder, Instagram, Facebook, Twitter e era plana web oficiau (www.vielha-mijaran.org). Atau madeish, tanben se pòt emplegar entà difóner alèrtes d’emergéncia s’ei eth cas.
En tot moment, era privacitat des persones que siguen usatgères d’aguesta canau de Whatsapp demore assegurada, pr’amor qu’en cap cas apareisheràn es numèros de telefon que se somen a d’aguesta airina de comunicacion. En cap cas, n’er Ajuntament n’es persones que seguissen eth canau an cap tipe d’accès as donades personaus.
“Des der Ajuntament de Vielha e Mijaran volem milhorar era comunicacion que mantiem sus era activitat deth govèrn municipau damb es nòsti ciutadans. Per açò, implementam aguesta naua airina que permet a trauès deth telefonet auer informacion rapida, dirècta e immediata de tot çò restacat damb era accion de govèrn abituau”, comente eth 2au tinent d’alcalde e còsso de comunicacion de Vielha e Mijaran, Alberto López. E ahig qu”èm era unica administracion dera Val d’Aran qu’a abilitat aguest nau canau de comunicacion e des pòqui qu’i a ena província de Lhèida, en tot aufrir ua comunicacion estreta damb era ciutadania”.
28/01/2025