Notícies Veir istoric
Vielha e Mijaran organize eth dusau Concors de Cuertmetratges “Vielha e Mijaran: Montanha e Cinèma”
Es nauetats d’aguesta edicion son era incorporacion dera categoria de cuerts registradi damb camara entàs adults e era categoria infantila en collaboracion damb era Escòla Garona
Er Ajuntament de Vielha e Mijaran organize, laguens des IIau Jornades Europèes de Cinèma de Montanha “Reiaume der Aneto-Interreg Poctefa” des pròplèu 9 e 10 de març de 2019, eth dusau Concors de Cuertmetratges: “Vielha e Mijaran: Montanha e Cinèma”.
Enguan, aguest concors aufrís ua dobla nauetat: Per un costat, era incoporacion d’ua categoria de filmacion de cuerts a trauès de camara (ena categoria d’adults), e tanben ua naua categoria escolara, dirigida as alumnes d’educacion primària dera Escòla Garona de Vielha. Eth plaç de presentacion des cuerts acabe eth dia 1 de març de 2019 tàs 14’00o.
Es principaus objectius deth concors son dar a conéisher eth potenciau naturau, socioculturau e esportiu deth municipi de Vielha e Mijaran e de tot eth territori aranès e promòir eth respècte ath miei naturau, eth coneishement des montanhes araneses e es bones practiques enes espòrts que se desvolopen ena natura.
Es cuertmetratges guanhadors en cada categoria seràn projectadi enes Jornades de Cinèma de Montanha “Reiaume der Aneto-Interreg Poctefa” 2019. Atau madeish, se projectaràn tanben enes festivaus de cinèma que desvolopen es municipis de Benasque e Luchon, coma sòcis deth projècte europèu “Reiaume der Aneto” e s’alotjaràn ena plana web der Ajuntament de Vielha e Mijaran.
“Enguan, damb es naues categories qu’auem creat entath concors, volem daurir mès eth ventalh de participaires, en tot recéber es filmacions autant des adults coma dera mainadèra”, comente Maria Vergés, dusau Tinent d’Alcalde e còsso de cultura der Ajuntament de Vielha e Mijaran. E hig qu’”aguest concors ei ua grana escadença entà dar a conéisher es nòstes montanhes dehòra deth nòste parçan e ath temps que mos ajude a seguir trabalhant entà posicionar-mos coma un municipi referent des zònes de montanha”. Vergés arregraïe tanben “era collaboracion dera Escòla Garona de Vielha qu’a incorporat aguest concors coma un projècte deth cors escolar”.
Es bases deth concors e era huelha d’inscripcion se tròben ena plana web der Ajuntament : www.vielha-mijaran.org. Es òbres se poiran entregar presenciaument en madeish ajuntament o ben a trauès deth corrèu electronic: vielhacinemontanha@gmail.com abantes der 1 de març de 2019.